Пĕтĕм чăваш диктанчĕ-2021
Канашри педагогика колледжĕ «Пĕтĕм чăваш диктанчĕ-2021» акцие хаваспах хутшăнчĕ. Акцие Чăваш чĕлхи кунне тата çĕнĕ чăваш çырулăхне туса хунăранпа 150 çул çитнине халалланă. Асăннă акцин тĕп тĕллевĕ – чăваш чĕлхин пĕлтерĕшне, сумĕпе хисепне ÿстересси.
Чăвашла пĕлекен 7 вĕрентекен тата тĕрлĕ специальноçе алла илекен 21 студент хăйсем чăвашла тĕрĕс çырма пултарнине тĕрĕслерĕç.
Асăннă акци пурин кăмăлне те кайнине палăртмалла. Диктант çыракансен шухăшне палăртма ирĕк парсамăр.
П.С.Семенов тата Г.М.Мельников, колледжра нумай çул вăй хуракансем, çапла шухăшлаççĕ: « Чăвашла диктант çырманни чылай вăхăт иртнĕ пулин те хамăр тăван чĕлхен çепĕçлĕхне туйма май туса пани чуна хавхалантарать».
С.Г.Васильева хăйĕн чÿнĕнче пăлхану пуррине палăртрĕ: « Чăвашла 38 çул çырман, математика учителĕ пулнă май мана чăвашла çырма йывăр пулчĕ, анчах пăр тапранчĕ темелле, килес çул та хутшăнма хавас».
Информатика уйрăмĕнче пĕлÿ илекен Андрей Федоров тăван чĕлхене юратнине палăртрĕ: «Мана чăваш чĕлхине юратма анне вĕрентнĕ, халĕ те эпĕ Тармăш ялĕнчи фольклор ушкăнне çуретĕп, тĕрлĕ уявсенче хутшăнма тăрăшатăп, чăваш юрри-ташши кăмăла каять».
О.В.Качанова вĕрентекен диктанта пĕр йăнăшсăр çырма пултарчĕ. Географи вĕрентекен Оксана Леонидовна кашни çул акцие хутшăнать, яланах питĕ аван паллăсем илет. В.А.Семенов, Н.А.Наумова вĕрентекенсем кăçал асăннă акцие пĕрремĕш хут хутшăнаççĕ, кăсăклă пулнине палăртаççĕ. Студентсем те асăннă акцин кăсăклăхне палăртрĕç.
Юлашкинчен çакна палăртса хăварас килет: малашне те чăваш чĕлхин хисепĕ сÿнмĕ, çуталсах тăрĕ, унăн сăваплăхĕ хамăр алăра.
30.04.2021
О.Л.Васильева, вĕрентекен