Пĕтĕм чăваш диктанчĕ-2023
Канашри педагогика колледжĕ «Пĕтĕм чăваш диктанчĕ-2023» акцие хаваспах хутшăнчĕ. Акцие Иван Яковлевич Яковлев аслӑ Вӗрентекенӗмӗр ҫуралнӑранпа 175 ҫул, Раҫҫейре Вӗрентекенпе ӑс паракан ҫулталӑкне тата Чӑваш чӗлхи кунне халалланӑ.
Акцин тӗп тӗллевӗ — чӑваш чӗлхин пӗлтерӗшне, сумӗпе хисепне ӳстересси. Кӑҫалхи текста Юхма Мишшин «Ҫутлӑх паттӑрӗ» хайлавӗнчен илнӗ.
Чăвашла пĕлекен 6 вĕрентекен тата тĕрлĕ специальноçе алла илекен 26 студент хăйсем чăвашла тĕрĕс çырма пултарнине тĕрĕслерĕç. Асăннă акци пурин кăмăлне те кайнине палăртмалла. Диктант çыракансен шухăшне палăртма ирĕк парсамăр.
П.С.Семенов, Л.В.Петров, Г.М.Мельников, колледжра нумай çул вăй хуракансем, çапла шухăшлаççĕ: «Чăвашла диктант çырманни чылай вăхăт иртнĕ пулин те хамăр тăван чĕлхен çепĕçлĕхне туйма май туса пани чуна хавхалантарать».
О.И.Маркова çапла палăртрĕ: «Чăвашла тахçанах диктант çырман, истори учителĕ пулнă май мана чăвашла çырма пит йывăрах пулмарĕ. Пăр тапранчĕ темелле, килес çул та хутшăнма хавас».
Информатика уйрăмĕнче пĕлÿ пухакан каччăсем тăван чĕлхене юратнине палăртрĕç: «Пире тăван чĕлхене юратма анне вĕрентнĕ, шкулта та юратса вĕреннĕ, чăваш юрри-ташши кăмăла каять».
О.В.Качанова вĕрентекен кашни çул акцие хутшăнать, яланах питĕ аван паллăсем илет.
1 курсра вĕренекенсем кăçал асăннă акцие пĕрремĕш хут хутшăнаççĕ, кăсăклă пулнине палăртаççĕ.
Юлашкинчен çакна палăртса хăварас килет: малашне те чăваш чĕлхин хисепĕ сÿнмĕ, çуталсах тăрĕ, унăн сăваплăхĕ хамăр алăра.